Ministri i Jashtëm i Greqisë, Nikos Dhendhias u shpreh nga Kuvendi se marrëveshja e detit me Shqipërinë, firmosur në kohën kur qeveriste partia e tij, Demokracia e Re në vitin 2009, nuk ka gjetur ende zbatim.
Shefi i diplomacisë greke, sqaroi se do ta kushtëzojë hapjen e negociatave për anëtarësim të Shqipërisë në BE, me minoritetin grek.
“Shqipëria vazhdon të mos përmbushë detyrimet në raport me të drejtat minoritare dhe pronësore të minoritetit etnik grek. Prandaj, në kuadër të hapjes së negociatave të anëtarësimit me Shqipërinë (për çka BE ka shtruar kushte të qarta), do të vazhdojmë të mbikëqyrim ngushtësisht përmbushjen nga Shqipëria të pesë kritereve bazike. Do të vazhdojmë të mbikëqyrim ngushtësisht respektimin me vepra të të drejtave të njeriut. Për gjithë qytetarët shqiptarë, përfshirë të drejtat e pronës të minoritetit autokton grek”, deklaroi Dendias.
Ndërkohë, sa i përket marrëveshjes së Prespës, Nikos Dhendhias tha: “Qëllimi ynë është që të bëjmë gjithçka që është e mundur për të pakësuar pasojat negative të marrëveshjes. Do të synojmë thellimin e marrëdhënieve me fqinjin tonë verior, në kuadër të bashkëpunimit me dobi reciproke. Mirëpo nuk do të tolerojmë fenomene të mosrespektimit të plotë të marrëveshjes.”
