Tërmeti i fuqishëmprej 6.4 ballësh ka sjellë pasoja tronditëse në vend, ku deri më tani raportohen 47 viktima.
Ndihma të shumta janë mbledhur si nga brenda vendit po ashtu edhe nga jashtë, për t’i ardhur në ndihmë banorëve të prekur. Një nga biznesmenët më të mëdhenj në Shqipëri, Shefqet Kastrati ka vendosur që në kuadër të kësaj kauze të dhurojë 1.5 milionë euro.
Përmes një postimi në Facebook, Kastrati u shpreh se kjo nuk është dita që shqiptarët të kursejnë. Si gjithashtu pohon se ka dhënë urdhrin e mosmarrjes së asnjë pagese nga askush që ka kaluar në Rrugën e Kombit për ndihmë.
Postimi i plotë:
Tragjedia Shqiptare më ka tronditur thellësisht mua dhe familjen time, bashke me vëllezerit e mi.
Jemi munduar të ndihmojmë e të lehtësojmë sa mundemi këto ditë. Si gjithnjë – pa zhurmë.
E kam dhënë në çast urdhërin e mosmarrjes së asnjë pagese nga askush që ka kaluar nëpër Rrugën e Kombit për ndihmë.
Pa bërë asnjë publicitet, sepse gjithmonë kam ecur me parimin: “Kur ndihmon një rob të Zotit në nevojë, duhet ta shohë veç Ai lart!”.
Unë dhe familja ime kemi ndarë 1.5 milionë euro që kjo dhimbje e madhe që të lehtësohet sado pak.
Vendosëm ta bëjmë publik kontributin tonë për familjet e tërmetit vetëm që t’i bëjmë thirrje atyre që kanë më shumë se të tjerët: Kjo s’është dita të kursejë asgjë shqiptari që ka shumë për shqiptarin që ka humbur gjithçka!
Ngushëllime familjarëve që humbën njerëz në këtë katastrofë dhe Zoti i Madh qoftë me Shqipërinë e plagosur!
