Kryetari i Partisë Bindja Demokratike, Astrit Patozi ka reaguar ndaj deklaratave dhe sulmeve të Ramës ndaj partisë së re në seancën e sotme plenare.
I ftuar në Real Story me Sokol Ballën, Patozi u shpreh se kryeministrin më shumë se sa individi, e shqetëson sistemi, pasi sipas tij, nuk do që të ketë tjetër mes tij dhe Bashës.
“Rama nuk e ka problemin tek fakti që mund ta mund unë, sepse une jam realist, por ai ka problemin tek sistemi dhe nuk do që të ketë një tjetër mes tij dhe Bashës. Është absurde kur thonë që ti nuk mund të jesh opozitë. Nëse Basha ka problem për opozitën, ia jap me shkrim që ai është opozita kryesore, unë jam opozita e vogël”, tha Astrit Patozi.
Ndërkohë, Patozi ka komentuar edhe raportin që ka me deputeten Rudina Hajdari dhe çfarë kanë diskutuar për partinë e re, Bindja Demokratike.
“Nuk ndodhi asgjë për t’u çuditur me Rudina Hajdarin. Kemi komunikuar. Unë e kam mbështetur atë përpara se të vendosej krijimi i Bindjes Demokratike”, pohoi Patozi.
