Gazetari Mentor Kikia dhe ish-deputeti Ervin Salianji kanë pasur një përplasje në studion e lajmeve në RTV Ora. Kikia tha se edhe ish-deputeti i PD, nuk e dinte ku e kishte zonën elektorale. Madje ai vijoi më tej me atë se çfarë ndodhi në Kuvend, ku sipas tij, deputetët nuk dinë zonat elektorale, e jo më të zgjidhin hallet e qytetarëve. Gazetari i cilësoi deputetët si karagjozë, të cilët paguhen me taksat e popullit, dhe që nuk kanë bërë asnjë punë të vetme.
“Edhe z. Salianji ishte i emëruar, nuk ishte i zgjedhur dhe z. Salianji nuk e dinte ku e kishte zonën elektorale. Sot kishte një skenë qesharake, që u zhvillua në Parlament. Agjenda ishte hallet e qytetarëve, sot deputetet duhet të raportonin çfarë problemesh kishin hasur qytetarët në zonat e tyre elektorale. Por asnjë prej tyre nuk e di ku e ka zonën. Janë karagjozë, përfshi edhe listën rezervë të PD, e mbushur me karagjozë që sot paguhen me taksat tona dhe nuk kanë bërë një lekë punë. Unë nuk e di pse duhet të paguhen ata njerëz”.
Nga ana tjetër, Salianji tha se ata janë njerëz të vendosur nga partitë aleate, si pasojë e një marrëveshje të nxituar. “Këto nuk qëndrojnë fare, ky përgjithësimi që janë të gjithë njësoj nuk shkon. Shumica e atyre dhe ata që janë bërë qesharak, janë nga partia aleate. Për shkak të një marrëveshje të nxituar në maj, u detyruan të hyjnë në partinë tonë.
Por ne po flasim për kriminelë, njerëz që janë vendosur vetëm për këtë qëllim. I vendosi kriminel për të kërcënuar votuesin. Ne kemi dalë nga Parlamenti, ata janë njerëz që qytetarët na i kanë refuzuar. Ata nuk janë zgjedhur nga qytetarët, janë futur për shkak të një mekanizmi që i duhen Ramës. Ata janë njerëz që janë vendosur nga partitë aleate. Nuk më bën përshtypje mua një idiot që është aty, që ka hyrë aty dhe është analfabet më shumë sesa këta që merren me krimin. Ne kemi vendosur mekanizmat tona”.
