Kandidati për kryetar të Partisë Demokratike, Fatbardh Kadilli ka bërë me dije se ish-kryeministri Sali Berisha ka pasur dijeni që në shkurt për vendimin e Departamentit Amerikan të Shtetit, për ta shpallur ”non grata”.
I ftuar në emisionin “Çim Peka Live”, Kadilli tha se faji për shpalljen “non grata” ishte i kreut të Partisë Demokratike, Lulzim Basha.
Fatbardh Kadilli: “Edhe për këtë që ndodhi kishte informacione, që në shkurt. Edhe Berisha e dinte, bashkë me Bashën. Di edhe si kanë ardhur deri këtu. Në bindjen time ka një frakturë në kominikimin me partnerët strategjikë. Fajësoj kryetarin e opozitës. Atë s’ke nga ta kapësh e nga ta lësh. Me aleatët duhet që të flasësh troç. Nuk do ta përjashtoja Berishën se është institucion. Është i barazvlershëm me PD. Nuk krahasohet me Tom Doshin.”
Më 19 maj, Departamenti amerikan i Shtetit (DASH), shpalli ”non grata” ish-kryeministrin Sali Berisha dhe familjen e tij.
Lajmi u dha nga Sekretari Amerikan i Shtetit, Antony Blinken i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
Berisha ka vendosur të padisë Blinken në Gjykatën Korreksionale të Parisit për shpifje publike, teksa avokati i tij do të jetë Jean-Yves Le Borgne.
