Deputeti demokrat Flamur Noka i është drejtuar me një shkresë Drejtorit të Përgjithshëm të Policisë së Shtetit, Gledis Nanos, për të mësuar arsyen se pse u rrethua selia e PD-së në 11 dhjetor.
Në 11 dhjetor u mbajt Kuvendi i thirrur nga delegatët, që u finalizua me votimin për shkarkimin e Lulzim Bashës. Noka kërkon të dijë arsyet që policia rrethoi selinë blu. Dhjetra forca policie rrethuan në një perimetër të gjerë selinë e PD-së.
Letra e Flamur Nokës drejtuar Gledis Nanos:
Gjatë punimeve të Kuvendit Kombëtar të Partisë Demokratike, ditën e shtunë, datë 11.12.2021 nga ora 12:00 deri rreth orës 18:00, Policia e Shtetit ka patur të përqëndruar në të gjithë perimetrin e godinës së Selisë Qëndrore të Partisë Demokratike prezencë të Forcave Speciale të Policisë së Shtetit (FNSH, RENEA), në kundërshtim me çdo akt dhe urdhër që normojnë punën e Policisë së Shtetit.
Ky veprim nga ana e Policisë së Shtetit konstatohet për herë të parë në 31 vite pluralizëm, ku forcat policore në mënyrë të kundraligishme përfshihen në një situatë të brendshme të një partie politike në Shqipëri.
Duke u nisur nga këto fakte, kërkojmë nga ana juaj informacion se kush janë arsyet, informacionet tuaja për këtë veprim, nga ju kanë ardhur këto të dhëna dhe kush është institucioni që ka kërkuar këtë përqëndrim të forcave policore, pranë selisë së PDSH-së.
Në pritje të një përgjigje shteruese për sa kërkohet më sipër.
