Ish-deputeti i PD, Flamur Noka, ka përgënjeshtruar deklaratën e kryetares së LSI, Monika Kryemadhit, e cila tha se ‘futemi në zgjedhje me ose pa Ramën kryeministër’.
I ftuar në studion e ‘News 24’, Noka e hodhi poshtë këtë deklaratë publike të Kryemadhit. Ai tha se në tryezën e opozitës, nuk është artikuluar se do të ketë zgjedhje me Ramën. Po kështu, opozita e ka të patjetërsueshëm qëndrimin për zgjedhjet.
“Znj. Kryemadhi ka bërë me dije se edhe me Edi Ramën opozita fiton. Por deri më sot në tryezën e opozitës sot nuk është artikuluar se do të ketë zgjedhje me Edi Ramën. Opozita e ka të patjetërsueshëm qëndrimin për zgjedhjet “, tha Noka.
I pyetur më tej nëse po krijohet një përçarje mes opozitës, Noka theksoi se opozita ka qëndrime të unifikuara.
“Opozita në tryezat e mbledhura ka patur diversitete mendimesh, por ka dalë me një qendrim. Edhe në tryezën e radhës, qendrimi i opozitës do të jetë unik. LSI nuk ka deklaruar se ne do shkojmë në zgjedhje ndryshe nga opozita. Kemi qendrim të unifikuar”, tha Noka.
