UPDATE-Adriatik Llalla nuk ia hedh dot Vettingut. Pavarësisht përpjekjeve të Ish-kryeprokurorit duke kërkuar azil politik në Gjermani apo lëvizjet e tij së fundmi në Turqi, Llalla nuk do t’i shpëtojë dot procesit të rivlerësimit.
Ish-kryeprokurori po gjykohet në mungesë nga Komisioni i Pavarur i Kualifikimit dhe po tenton t’i shpëtojë përballjes me drejtësinë.
Ai ka autorizuar avokatin e tij Sokol Hazizaj për të marrë në dorë mbrojtjen e tij. Megjithatë, sipas KPK-së, Llalla nuk do t’ia hedhë dot Vettingut pavarësisht manovrave të tij të njëpasnjëshme.
Ish-kryeprokurori ka kërkuar t’i shpëtojë Vettingut përmes dorëheqjes te presidenti Meta, por KPK ia ka cilësuar si të pavlefshëm duke qenë se dorëheqjen nga të qenit magjistrat duhet ta kishte paraqitur pranë Këshillit të Lartë të Drejtësisë për sa kohë nuk është ngritur institucioni i Lartë i Prokurorisë.
Ditën e sotme, në orën 10:00 nisi seanca dëgjimore në Kolegjin e Posaçëm të Apelimit për ankimin e komisionarit publik, në lidhje me vendimin e Komisionit të Pavarur të Kualifikimit, për ndërprerjen e procesit të rivlerësimit për ish-Kryeprokurorin Adriatik Llalla.
Komisioneri Publik ka shpjeguar para gjyqtareve arsyet përse Vettingu për Adriatik Llallën nuk mund të ndërpritet.
Komisioneri publik: Adriatik Llalla kur ishte prokuror ka dërguar në KPK dokumentet për rivlerësimin kur ishte në detyrë. Kjo trupë ka nisur veprimet hetimore, ndërkohë që Llalla me 24.1.2018 i ka dërguar letër KPK-së se nuk është me pjesë e drejtësisë, pas zgjedhjes se kryeprokurores së re. Në përgjigje të shkresës së tij, KPK i kthen përgjigje Llallës, duke e informuar se edhe pas përfundimit të mandatit ai ishte sërish magjistrat. KPK i ka thënë Llallës se Vettingu ndërpritet vetëm kur jep dorëheqjen nga sistemi.
Llalla më 12 shkurt dërgon letrën e dorëheqjes te Presidenti i Republikës, ku shkruan se heq dorë nga të qenit magjistrat. Më 16 shkurt KPK ndërpret procesin e rivlerësimit për Llallën pas dorëheqjes së tij si magjistrat. Në rastin konkret, Llalla ka zgjedhur të mos i nënshtrohet Vettingut. Por sipas nesh, KPK nuk mund ta ndërpriste Vettingun, pasi Llalla ishte magjistrat edhe ditën kur KPK ka vendosur të ndërpresë Vettingun. Sipas ligjit, statusi i magjistratit mbaron kur subjekti jep dorëheqjen te Këshilli i Lartë Gjyqësor ose Këshilli i Lartë i Prokurorisë. Në kushtet kur këto dy institucione nuk janë ngritur akoma, ligji parashikon që duhet ta kishte dërguar dorëheqjen në KLD.
11:00-Kolegji i Posaçëm i Apelimit është tërhequr për të shqyrtuar kërkesën e ish-kryeprokurorit Adriatik Llalla për ta përfaqësuar avokati i tij Sokol Hazizaj.
Llalla i është drejtuar Kolegjit përmes një prokurore të posaçme ku kërkon që të përfaqësohet nga avokati Hazizaj përpara çdo organi gjyqësor. Nga kërkesa e shkruar në turqisht lë të kuptohet se ai shkruan nga Turqia. Ndërsa në Shqipëri po shqyrtohet procesi i Vettingut ndaj të tij të cilin Llalla e ka apeluar përmes avokatit të tij.
“Emëroj si përfaqësues ligjor avokatin Sokol Hazizaj, i jap të drejtën për të më mbrojtur apo përfaqësuar para çdo organi gjyqësor. Në kushtet kur kam marrë dijeni për orën dhe datën e gjykimit ditën enjte 31.5 2019 në orën 1- prapë KPA do të gjykohet në seancë gjyqësore publike cështja nr 1 e vitit 2018, për ankimin që komisioneri publik ka bërë kundër vendimit të KPK për rivlerësimin. E kam të pamundur të jem i pranishëm apo të paraqitem, si dhe më pas autorizoj caktoj si përfaqësues të posaçëm ligjor avokatit Hazizaj për të më përfaqësues gjatë dhe gjithë gjykimin në mungesën time, Avokatit i njoh të drejtën që të më mbrojë të paraqesë çdo ankesë dhe të grumbullojë prova dhe ti paraqesë ato para KPA”, ka qenë përmbajtja e prokurës.
Seancën e 16 majit, ish-Kryeprokurori nuk ishte i pranishëm në seancë, pasi ndodhej jashtë Shqipërisë, dhe u përfaqësua nga avokati Sokol Hazizaj.
Sot në orën 10:00, do të mbahet seanca dëgjimore në Kolegjin e Posaçëm të Apelimit për ankimimin e komisionarit publik, në lidhje me vendimin e Komisionit të Pavarur të Kualifikimit, për ndërprerjen e procesit të rivlerësimit për ish-Kryeprokurorin Adriatik Llalla.
Seanca e sotme është vazhdimi i asaj të 15 ditëve më parë, e cila u shty pasi Llalla nuk kishte marrë njoftim për të dhe se avokati i tij duhet të rifreskonte prokurën. Ai tha se kishte dy javë që nuk komunikonte me klientin e tij, duke ngjallur reagime të ndryshme në media.
Hazizaj kërkoi jo më pak se 15 ditë kohë nga trupi gjykues, në përbërje të të cilit është edhe paraardhësja e Llallës në Prokurorinë e Përgjithshme, Ina Rama.
Kujtojmë se procesi i rivlerësimit për ish-Kryeprokurorin Llalla nisi në nëntor 2017, por ai u ndërpre me vendim të Komisionit të Pavarur të Kualifikimit.
Shkak për ndërprerjen u bë dorëheqja e Llallës nga sistemi i drejtësisë. Ish-kryeprokurori Llalla vendosi që të mos e shfrytëzojë privilegjin ligjor për t’u emëruar në Apel.
Mirëpo, pas regjistrimit të procedimit penal ndaj Llallës, në mars të këtij viti në Prokurorinë e Durrësit, komisionari publik vendosi të apelojë vendimin për ndërprerjen e procesit të rivlerësimit ndaj ishKryeprokurorit.
Mbetet të shihet se cilat janë argumentet e komisionarit për vazhdimin e vetingut për Llallën. Nga ana tjetër, ish-Kryeprokurori është nën hetim për katër vepra të ndryshme penale.
Çfarë ndodhi në seancën e 16 majit
Verdikti u mor në atë kohë nga trupi gjykues i KPK me kryesues Roland Ilia dhe anëtarët Pamela Qirko dhe Olsi Komçi.
Sokol Çomo: Kur keni komunikuar për herë të fundit me të përfaqësuarin tuaj?
Avokati i Llallës: Para dy javësh.
Sokol Çomo: Keni komunikuar direkt?
Avokati i Llallës: Jo, përmes familjarëve, përmes bashkëshortes.
Sokol Çomo: Po direkt kur ka qenë komunikimi i fundit?
Avokati i Llallës: Më shumë se dy javë më parë.
Luan Daci: Keni tagër të mbroni këtë subjekt?
Avokati i Llallës: I kam të gjithë tagrat.
Trupa gjykuese tërhiqet për të marrë një vendim për prokurën e përfaqësimit të avokatit
Sokol Çomo: I kërkojmë avokatit të plotësojë prokurën e përfaqësimit, duke u shprehur në mënyrë të posaçme vullneti i Llallës për ta përfaqësuar plotësisht në Komisionin e Posaçëm të Apelimit.
Sokol Hazizaj: Brenda 15 ditëve mund të realizohet njoftimi i subjektit të rivlerësimit.
Sokol Çomo: Shtyhet seanca për në 31 Maj 2018 ora 10.
