Në filmin “Rain Man” (Njeriu i Shiut), aktori amerikan Dastin Hofman, luan rolin e një njeriu autik me një aftësi të pabesueshme për të kujtuar detaje, duke numëruar me një shikim të vetëm qindra kunja dhëmbësh që bien përtokë, dhe shumë veprime të tjera mahnitëse mendore.
Ai film mbetet aq popullor, sa që shumë njerëz mund të mos e kuptojnë që personazhi i Hofman, ishte i bazuar mbi një person të vërtetë: Kim Peek, Njeriu i vërtetë i Shiut. Dhe në fakt jeta e pabesueshme e Peek, ishte edhe më e mahnitshme se sa përshkruhet në film.
Peek lindi me një tru realisht të jashtëzakonshëm, të cilit i mungonte një grup nervash, që lidh zakonisht të dyja hemisferat. Por me kalimin e viteve, kjo anomali i dha atij disa aftësi mendore befasuese. Kur ishte vetëm 2-vjeç, Peek ishte në gjendje të mësonte përmendësh sasi të mëdha informacioni.
Ai kishte gjithashtu një aftësi të pazakontë për të lexuar libra, me një shpejtësi të jashtëzakonshme. Peek mund të lexonte shumicën e librave në më pak se 1 orë, duke kujtuar pothuajse gjithçka që kishte lexuar. Një pjesë e kësaj aftësie, ndihmohej nga fakti që ai mund të lexonte në fakt dy faqe njëkohësisht, një faqe me secilin nga sytë.
Duke lexuar faqen e djathtë të librave me syrin e tij të djathtë, dhe faqen e majtë me syrin e tij të majtë, Kim Peek e kaloi pjesën më të madhe të jetës së tij duke lexuar. Kjo aftësi, e kombinuar edhe me aftësinë e tij të jashtëzakonshme për të ruajtur informacione, e shndërroi Kim Peek në një enciklopedi të gjallë.
Për shembull, ai mund të jepte udhëzime të hollësishme për orientimin në çdo qytet të botës, bazuar në hartën së cilës ai sapo i kishte hedhur një sy. Për më tepër, Njeriu i vërtetë i Shiut kishte një aftësi të jashtëzakonshme për të bërë llogaritje mendore mbi kalendarët.
Për shembull, ju mund t’i thoshit Peek çdo ditë të historisë, dhe ai ishte në gjendje t’ju tregonte se cila ditë e javës ishte. Ai u afrohej shpesh të panjohurve, dhe i linte ata pa fjalë, duke iu thënë se në cilën ditë të javës kishin lindur, bazuar vetëm në datën e lindjes, apo edhe disa nga ngjarjet më të rëndësishme që ndodhën atë ditë.
Po çfarë i dha saktësisht Kim Peek, aftësitë e tij të jashtëzakonshme? Studiuesit që janë marrë me këtë rast, kanë sugjeruar se të lindurit pa asnjë lidhje midis 2 hemisferave të trurit, nënkupton që ai ishte në gjendje të përpunonte në çast më shumë informacione se njerëzit e zakonshëm.
Por në dallim nga shumë njerëz me të njëjtën gjendje të trurit, truri i Peek zhvilloi lidhje të ndryshme, që shumica e njerëzve nuk i realizojnë dot. Këto lidhje shtesë, i dhanë atij mundësi të kujtonte një ssasi të pabesueshme informacioni.
Megjithatë, gjendja e tij e veçantë i shkaktoi jo pak probleme serioze. Megjithë kujtesën e tij fenomenale, Peek nuk kishte një inteligjencë natyrale të spikatur. Ai pati shumë probleme me lëndët, që kërkojnë aftësi arsyetuese si matematika.
Dhe koefiçenti i tij i inteligjencës (IQ) ishte vetëm rreth 87, pra nën kufirin normal, që është midis 90-110. Peek kishte gjithashtu edhe shumë probleme zhvillimore. Ai mësoi të ecte vetëm kur ishte gati 4-vjeç, dhe kërkonte ndihmën e të tjerëve edhe për veprime shumë elementare, si për shembull mbërthimi i kopsave të këmishës.
Për fatin e tij të mirë, Peek pati një baba tepër të përkushtuar, Fran, që e kaloi pjesën më të madhe të jetës duke u kujdesur për djalin e tij të talentuar, dhe duke kryer detyrat që i biri e kishte të vështirë t’i bënte. Në vitin 1984, babë e bir u takuan me skenaristin Berri Morrou, dhe bashkëpunimi mes tyre çoi në shkrimin e skenarit të filmit “Rain Man”.
Popullariteti që solli filmi, nxiti pjesëmarrjen e Peek në një seri emisionesh televizive. Ai ngjalli edhe interesin e shkencëtarëve, që e skanuan trurin e tij, për të kuptuar më mirë se si funksionon truri i njeriut. Kim Peek vdiq nga një sulm në zemër në vitin 2009, në moshën 58-vjeçare.
Ishte fundi i një jete të jashtëzakonshme. Siç është shprehur Berri Morrou për të: “Unë besoj se cilido që mund të bisedonte edhe vetëm 5 minuta me Kim, do të ndahej prej tij me një pikëpamje paksa të ndryshuar mbi veten, botën dhe potencialin tonë si qenie njerëzore”./ TIRANA TODAY
