Krahu i djathtë i ish-prokurorit të Përgjithshëm Adriatik Llalla, Rovena Gashi po kërkon një vend në Gjykatën Kushtetuese pas skandaleve që përfshin atë dhe vetë Llallën në Prokurorinë e Përgjithshme.
Të gjitha veprimet e kryera më parë prej Gashit në prokurorinë e Përgjithshme u pasuan me shkarkimin e saj prej prokurores së re të Përgjithshme Arta Marku. Ndërsa tani pas ikjes nga organi kryesor i akuzës Gashi po kërkon një vend në Gjykatën Kushtetuese.Kjo rezulton në listën e kandidatëve për vendet vakante në Gjykatën Kushtetuese të publikuar nga Presidenti i vendit Ilir Meta.
Gashi ka aplikuar për një nga vendet vakante në Kushtetuese, ndërsa u bë e njohur për afërsinë e saj me Adriatik Llallën dhe pas përplasjes me Prokuroren e Përgjithshme të Përkohshme Arta Marku, bashkë me bashkëshortin e saj Dritan Ginën, ish-drejtuesi i prokurorisë së Elbasanit, pasi të dy u larguan nga Marku nga pozicionet e tyre respektive.
Por, më shumë se kaq, ajo që bie në sy lidhet me pasurimin marramendës në një kohë kaq të shkurtër të Rovena Gashit, e cila tani kërkon edhe një vend në Gjykatën Kushtetuese.
Nisur nga investigimet e fundit në media, ish-drejtoresha e Marrëdhënieve Juridiksionale me Jashtë dhe për Dekriminalizimin në Prokurorinë e Përgjithshme rezultoi se Gashi kishte fshehur 16 pasuri në një vlerë mbi 2 milionë euro.
Përgjatë vitit 2012 kur ishte një prokurore e thjeshtë Gashi jetonte në një banesë në Durrës ku asaj i takonin 20% (1 milion lekë të reja) ose 10- 15 metra të një shtëpie 2+1 dhe shkonte në punë me një Fiat Punto.
Ndërsa në vitin 2013 kur ajo sapo u emërua nga Prokurori i Përgjithshëm i ri i vendit (7 dhjetor 2012) Adriatik Llalla, në pozicionin e Drejtoreshës së Marrëdhënieve Juridiksionale me Jashtë pasuria e saj lulëzoi.
Duke qenë krahu i djathtë i Adriatik Llallës, Gashi arriti të kishte shtëpinë e saj të re në Tiranë, shtëpi të re në Durrës dhe makinën e saj të re.
Nga ana tjetër, prokuroria ka ngritur dyshime të forta se një pjesë e pronave të padeklaruara nga Rovena Gashi, të denoncuara si një skandal i madh me zyrtarët e lartë të drejtësisë nga ana e mediave, mund të jenë të ish-Kryeprokurorit të Përgjithshëm, Adriatik Llalla.
Ky i fundit mësohet se është larguar nga vendi pas nisjes së hetimeve për “pastrim të veprës penale” dhe pas investigimeve në media mbi pasurinë e tij të ngritur në mënyrë krejt të dyshimtë. Aq sa edhe vetë Ish-Sekretari Amerikan i Shtetit Rex Tillerson e shpalli atë non-grata duke i mohuar hyrjen në Shtetet e Bashkuara të Amerikës bashkë me të afërmit e tij.
Më poshtë deklaratat e pasurisë së viteve 2012 dhe të 2013 që shpjegojnë këtë kapërcim pindarik të stadit social ekonomik dhe standardit të jetesës së Rovena Gashit.
DEKLARATA E PASURISE E VITIT 2013
Një ditë më parë, Këshilli i Emërimeve në Drejtësi mori në dorëzim kandidaturat e Presidencës për dy vakancat në Gjykatën Kushtetuese të shpallur nga ky institucion, midis të cilave është edhe Rovena Gashi.
Sipas Kushtetutës, Këshilli i Emërimeve në Drejtësi bën vlerësimin e kandidatëve dhe i rendit sipas meritës profesionale. Presidenti i Republikës dhe Kuvendi më pas do të zgjedhin anëtarët mes dy listave për të plotësuar tri vakancat në Gjykatën Kushtetuese.
Lista e kandidatëve të Presidentit:
Alban Brati
Avni Shehu
Besnik Muçi
Dedë Kasneci
Denar Biba
Gëzim Allaraj
Ilir Mustafaj
Ilir Panda
Kristaq Traja
Luan Dervishi
Petrit Kaja
Rexhep Bekteshi
Sinan Tafaj
Theodhor Sollaku
Vladimir Gërmenji
Ardita Alsula
Arta Vorpsi
Elsa Toska
Regleta Panajoti
Rovena Gashi
Valbona Bala
Zhaklina Peto
Lista e kandidatëve të Kuvendit
Anila Kristani
Arta Vorpsi
Besnik Muçi
Çlirim Gjata
Dashamir Kore
Dedë Kasneci
Denar Biba
Elsa Toska
Gëzim Allaraj
Ilir Kadiu
Ilir Panda
Irena Nino
Kostandin Kazanxhi
Kristaq Traja
Rexhep Bekteshi
Sinan Tafaj
Sokol Hasani
Shpresa Beçaj
Theodhor Sollaku
Valbona Bala
