Zv/ministrja e Shëndetësisë, Mira Rakacolli deklaroi se shifrat e larta të ditëve të fundit ishin të pritshme, që në momentin që u vendos për hapjen e vendit.
E ftuar në emisionin “Wake Up”, Rakacolli sqaroi se rastet e konfirmuara deri më tani janë të përballueshme.
“Çdo program hapje shoqërohet me rritje, kudo është ky fenomen, ne e prisnim , kemi menduar dhe një maksimum numrash në rast hapjesh dhe se deri ku mund të përballohen. Dhe këto që kemi aktualisht janë të përballueshme. Momenti që u bë hapja ishte tërësisht e arsyeshme kjo gjë”, tha ajo.
Rakacolli tha se ka pasur një neglizhencë nga qytetarët lidhur me respektimin e masave, teksa shprehet se “njerëzit po sillen sikur të kishte mbaruar pandemia”.
“Vërtet u tha se do hapen të gjitha, bizneset etj me radhë, por të gjitha këto duhet me protokolle, me maska, distancim etj me radhë dhe të gjitha këto nuk janë zbatuar fatkeqësisht, sepse po vëmë re se njerëzit po sillen sikur të kishte mbaruar pandemia”, tha ajo.
