Mjeku i njohur Tritan Kalo, në një intervistë për “Report Tv” ka folur lidhur me pandeminë dhe sa të rrezikuar jemi në një valë të dytë të infeksionit. Ai ka paralajmëruar qytetarët se koronavirusi nuk është zhdukur, e për rrjedhojë, kujdesi do duhet të jetë maksimal.
Pyetur për një valë të dytë të infeksionit, Kalo tha se në këtë rast nuk do të kemi një rikthim, por rishfaqje. Mjeku shpjegoi se hapësia kohore nga 13 maj deri në shtator, do të na ndihmoj që të kemi më tepër imunitet. Për të tretën ditë Shqipëria ka regjistruar vetëm 4 raste të reja me koronavirus. Për epidemiologët, situata konsiderohet e qëndrueshme.
“Virusi nuk është në grahmat e fundit, por si një sëmundje respiratore, shkon në një vetëshuarje, por jo të plotë. Gradualisht COVID-19 do të klasifikohet si infeksion i vijave respitarore, që do të jenë me ne.
Në verë kemi disa infeksione që kalohen shpesh në plazh dhe kanë si simptoma gripi. Me ardhjen e vjeshtës do të riaktivizohen, dhe pa dyshim midis tyre nga tamponet që do të merret, detyrimisht do të jetë i pranishëm edhe COVID-19.
Nuk do të jetë një rikthim, por një rishfaqje i këtij virusi. Është i njëjti virus, nuk është më agresiv. Mendoj që shfaqja e këtij visuri nuk do të jetë më agresiv, hapësia kohore nga 13 maj deri në shtator, ka disa muaj dhe kontaktet sporadike do të na ndihmoj që të kemi më tepër imunitet”, tha Kalo.
