Presidenti i Kosovës, Hashim Thaçi bën me dije se një tjetër shtet ka njohur pavarësinë e Kosovës. Përmes një postimi në Twitter, Thaçi njofton se bëhet fjalë për shtetin e Xhamajkës.
“Xhamajka ka njohur Republikën e Kosovës si shtet sovran dhe të pavarur. Ky është rezultat i punës së vështirë dhe lobimit për vite të tëra nga kongresisti Eliot Engel. Punë e mirë. Faleminderit miqve tanë nga Kingstoni”, shkruan ai në postimin e tij.
Këtë lajm e ka përshëndetur edhe ministri në detyrë për Evropën dhe Punët e Jashtme, Gent Cakaj.
“Ky veprim shënon një moment të ri në kapitullin e marrëdhënieve mes Kosovës e Xhamajkës dhe rikonfirmon se kauza e drejtë e shtetit të Kosovës vazhdon të jetë shume e fuqishme në arenën ndërkombëtare”, shkruan ai në postimin e tij në Facebook.
