Lëvizja Vetëvendosje ka njoftuar se nuk do të organizojë protestë nesër, teksa theksoi se nuk dëshiron të dekurajojë protesta të tjera të paralajmëruara nga grupet e ndryshme të qytetarëve.
Pas takimit të kryesisë dhe grupit parlamentar, LVV ka dalë në një komunikatë për mediat. Ata treguan se në mbledhje është diskutuar situata politike në Kosovë, sidomos zhvillimet e fundit.
Gjithashtu ata kanë kritikuar ashpër aktgjykimin e fundit të Gjykatës Kushtetuese, që sipas tyre, ‘e vulosi këtë Gjykatë si të kapur, madje edhe më fort se shteti ynë në përgjithësi’.
“Përjashtimi edhe i zgjedhjeve edhe i fituesit është i pashembullt dhe e bën këtë aktgjykim të padrejtë e të papranueshëm. U vlerësua mbështetja e madhe e qytetarëve, puna e mirë e Qeverisë në detyrë, dhe organizimi nga aktivistët i peticionit “Duam Zgjedhje!” Duket qartë se ky peticion do t’i thyejë të gjitha rekordet duke u bërë peticioni më i madh në Kosovën e pasluftës”, thuhet në komunikatë.
Po ashtu thuhet se në mbledhje u kundërshtua tentimi për qeveri të re pa zgjedhje të reja, pasi sipas Lëvizjes Vetëvendosje kjo qeveri do të ishte e presidentit dhe nuk do të ngërthente as 1/3 e mbështetjes qytetare elektorale, si dhe do të varej komplet nga Lista Serbe dhe Serbia.
Kujtojmë se ditën e nesërme, në Kosovë do të mbahet seancë e jashtëzakonshme për votimin e qeverisë Hoti.
