Fondacioni “Fundjavë Ndryshe” do të shndërrohet në qendrën më të madhe humanitare në Ballkan.
Më anë të një postimi në rrjetin social “Facebook”, Drejtori Ekzekutiv i fondacionit, Arbër Hajdari ka bërë të ditur nisjen e punimeve dhe se si do të jetë godina e re e Fundjavë Ndryshe, e cila synon të shndërrohet në një nga qendrat më të mëdha humanitare në rajonin e Ballkanit.
Hajdari thekson se “Fundjavë Ndryshe” do të kthehet në qendër multifunksionale do të shërbejë për grumbullimin e të gjithë llojeve të ndihmave, sistemimin dhe shpërndarjen në të gjithë trojet shqiptare”
Kur Arbër Hajdari nisi dy vite me parë “Fundjavë Ndryshe” si një iniciativë për të ndihmuar kryesisht familjet e varfra me ushqime e veshmbathje, nuk e kishte menduar që sot do të kishte të dhëna kaq befasuese duke u kthyer në qendrën më të madhe humanitare në Ballkan.
Kampusi i “Fundjavë Ndryshe” do të ketë një shkollë të madhe të arsimit profesional të cilën Hajdari e bëri publike me rastin e 2-vjetorit të Fundjavë Ndryshe: “Ne i kemi gati fëmijët apo njerëzit që do të marrin këtë zanat, që janë diku 1000 profesione. Do të mbajë një jetimore për fëmijët që nuk i kanë prindërit, një azil për pleqtë, një qendër riedukimi për minorenët që kryejnë vepra penale të vogla dhe ligji i konsideron që duhet të jenë pjesë e qendrave të riedukimit dhe një spital. Është një projekt goxha i madh që ne shpresojmë që në krye të tre viteve të përfundojë dhe nisë punën.”
Postimi i plotë i Arbër Hajdarit
Të nderuar Miq,
Shumë i lumtur të njoftoj fillimin e punimeve për Qendrën më të madhe humanitare në Ballkan “Fundjavë Ndryshe”.
Kjo Qendër multifunksionale do të shërbejë për grumbullimin e të gjithë llojeve të ndihmave, sistemimin dhe shpërndarjen në të gjithë trojet shqiptare.
Ju përqafoj të gjithëve
