Duke filluar që nga dita e sotme, studentët e universiteteve të Tiranës do të mund të pajisen me kartën e studentit.
Shpërndarja ka nisur sot në Fakultetin Ekonomik të Tiranës ku të pranishëm ishin edhe kryeministri Rama bashkë me Erion Veliajn.
Kartat e studentit sipas Veliaj do të shpërndahen në zyra të posaçme të vendosura në afërsi të godinave të çdo fakulteti dhe aplikimi për të do të zgjasë vetëm 4 minuta.
Përsa i përket shërbimeve, çdo dyqan do të ketë një tabelë ku thuhet se pranohet karta e studentit.
Shërbimet e tjera që ofrohen përfshijnë gjithashtu pajisjen e studentëve me një abone me kosto më të ulët përsa i përket transportit publik, libraritë, kinematë etj.
Sipas Ramës shpërndarja e këtyre kartave u bë e mundur vetëm falë protestës së studentëve. Rama ftoi edhe bashkitë e tjera që t’i bashkohen kësaj nisme.
