Komisioni i Ligjeve për shtatë kandidatët për kryeprokuror të përkohshëm të Republikës ka nisur seancën dëgjimore.
Në këtë mbledhje mungojnë deputetët e opozitës. Për këtë shkak, që në nisje të seancës, kreu i komisionit të ligjeve, Ulsi Manja si dhe anëtarja socialiste, Vasilika Hysi, kërkuan 15 minuta pushim, në mënyrë që komisioni të komunikojë me përfaqësuesit e opozitës. Manja lexoi emrat e kandidatëve në garën për kryeprokuror si Ferdinand Elezi, Arta Marku, Besnik Muçi, Arqile Koca, Granit Shahu, Ermira Tafani dhe Artur Selmani.
Edhe pas 15 minutave deputetët e opozitës nuk u paraqitën në mbledhje. Kryetari i komisionit, vendosi që mbledhja të vijojë edhe pa praninë e deputetëve te opozitës.
Pas seancës dëgjimore, komisioni i ligjeve do t’i drejtohet me një raport të detajuar Kuvendit për kandidatët në këtë garë, ndërsa do të jetë vota e Kuvendit që do të zgjedhë Kryeprokurorin e ri, i cili do qëndrojë në detyrë me një mandat të përkohshëm, deri në krijimin e Këshillit të Lartë të Prokurorisë, sipas ndryshimeve të parashikuara nga Reforma në Drejtësi. Nga ana tjetër, opozita nuk pajtohet me ndërprerjen e mandatit të Adriatik Llallës dhe emërimin e një Kryeprokurori të Përkohshëm. Si PD ashtu edhe LSI kërkojnë që Llalla të qëndrojë në detyrë deri në ngritjen e KLP.
I pari në këtë komision e mori fjalën kandidati Arqile Koça duke bërë një prezantim të punës së tij si prokuror deri më tani.
Kandidatët për kryeprokuror të përkohshëm janë;
Ferdinand Elezi
Arta Marku
Besnik Muçi
Arqile Koça
Granit Shahu
Ermira Tafani
Artur Selmani
