Pas më shumë se dy muaj të mbyllura për shkak të pandemisë, sot pritet që të hapen baret dhe restorantet. Sikundër është pasqyruar shpesh nga kryeministri Rama e ministrja Manastirliu, çdo gjë do të kryhet sipas një protokolli të caktuar. Rikthimi në normalitet do të jetë i vështirë, ndaj bizneset dhe qytetarët do ti përshtaten rregullave të reja.
Nën rregullat strikte, distancimi social dhe higjieno-sanitar, baret dhe restorantet do duhet të respektojnë distancimin prej 2 metrash nga tavolina në tavolinë. Po kështu, duhen siguruar dezinfektues në hyrje të bareve për klientët si dhe një higjienë e mirë për vetë personelin e shërbimit, që duhet të jetë i pajisur me maska e doreza.
Hapja e këtyre bareve do të jetë vetëm për pjesën e jashtme të tyre, pasi pjesa e brendshme nuk do të lejohet të funksionojë, në të kundërt do të gjobiten. Sa i takon dezinfektimit të ambienteve të bareve dhe restoranteve, ky proces parashikohet të kryhet 2 herë në ditë.
