Berisha e Meta marrëveshjen e firmosur mes tyre e konsideruan si fillimi i rrugës për të fituar pjesën më të madhe të Bashkive. Dy aleatët konfirmuan se do të përqendrojnë energjitë kryesore në Tiranën e drejtuar nga Erion Veliaj.
Një marrëveshje me 6 pika, thelbi i së cilës është dalja me kandidatë të përbashkët në zgjedhjet e ardhshme vendore më 14 maj, është zyrtarizimi i rrugëtimit të përbashkët mes Berishës dhe Metës.
Analisti Nikollë Lesi thotë se të gjithë demokratët janë me Sali Berishën, ndaj vendimi i gjykatës për statutin e PD-së duhet të jetë në favor të Berishës.
Në emisionin “Now” në “Euronews Albania”, Lesi u shpreh se nëse arrihet marrëveshja mes dy palëve në PD, beteja nëse fiton ose jo ky koalicion është Tirana.
“Nëse marrin Tiranën, ka rënë pushteti. Tirana është Vaterloja e madhe e këtyre zgjedhjeve. Nëse vendosin si sot, do ta humbin Tiranën. Berisha dhe Meta duhet të dalin mbi veten. U duhet një figurë karizmatike nga shoqëria civile për Tiranën”, tha Nikoll Lesi.
