Avokati Spartak Ngjela ka komentuar takimin e kryeministrit Rama në Beograd, me presidentin serb, Aleksandar Vuçiç dhe kryeministrin maqedonas, Zoran Zaev.
I ftuar në emisionin ‘360 Gradë’ në Ora News, Ngjela u shpreh se liderët shqiptarë shkojnë në Beograd sa herë që kërcënohen se do të rrëzohen nga pushteti.
Sipas tij, ideja e ‘Shengenit Ballkanik’ është një ide ruse e para 6 apo 7 muajve, ndërsa shton se shkuarja në Beograd është sëmundje e vjetër e liderëve shqiptarë.
“Gjithë klasa politike si në Shqipëri është e trembur sepse është nën akuzë. Që kur ka dalë Kushtetuta që kemi, sapo të përfundojë SPAK këta janë të gjithë nën akuzë. Jo se po akuzohen, por me radhë do kontrollohen si shkelës të ligjit ne funksion të korrupsionit. Kjo është frika politike e humbjes së pushtetit, por këtu është më e rëndë sesa kaq. Flasim për takimin me Vuçiç.
Mund të themi se ajo është kërkesë e politikës ruse para nja 6-7 muajsh, për krijimin e ‘Shengen-it Ballkanik’, në Ballkanin Perëndimor. Ne kemi një sëmundje të vjetër. Sa herë që kërcënohen liderët se do të rrëzohen në funksion të shkeljeve shkojnë në Beograd. Arsyeja është sepse ai ka 2/3 e territorit shqiptar”, tha Ngjela.
