Një 37-vjeçar u ndalua pasditen e djeshme në Kakavijë, pasi që po udhëtonte drejt Greqisë. Ai dyshohet se mund të ketë lidhje me vrasjen në një lokal në zonën e ish-Bllokut, mbrëmjen e së enjtes.
Policia dyshon se Geldo Hoti, ka qenë prezent në momentin e ngjarjes. I riu do të merret në pyetje për këtë çështje.
Për vrasjen janë shpallur ne kërkim nga policia komandoja Merviol Bilo, Ervin Mataj dhe Fabiol Alushi.
Mësohet se palët fillimisht janë konfliktuar verbalisht. Me pas mes tyre ka shpërthyer një konflikt fizik që në pak sekonda ka degjeneruar në përdorimin e armëve.
Nuk është e qartë se kush nga të 6 personat e përfshirë në konflikt ka përdorur armët. Pak orë pas krimit forcat e rendit gjetën një motor të braktisur në zonën e Kopshtit Zoologjik. Mjeti dyshohet mund të jetë përdorur nga dy prej autorëve për t’u larguar nga vendi i ngjarjes.
Dy të plagosurit Ervis Martinaj dhe Eljon Hato po kurohen në spital të mbikëqyrur edhe nga policia pasi atyre u është komunikuar masa e arrestit.
Njoftimi i policisë
Tiranë
Kapet dhe ndalohet një tjetër shtetas i përfshirë në konfliktin e ndodhur në një lokal në mbrëmjen e datës 05.10.2018, ku mbeti i vrarë shtetasi F. G., dhe u pagosën shtetasit E. M., dhe E. H.
Specialistët për Hetimin e Krimeve ndaj Jetës dhe Pronës në D.V.P. Tiranë në bashkëpunim me shërbimet e Policisë Kufitare Gjirokastër, mbasditen e djeshme kapën dhe ndaluan shtetasin :
– Geldo Hoti, 37 vjeç, banues në Tiranë.
Ky shtetas ka qenë i pranishëm gjatë konfliktit të ndodhur më datë 05.10.2018 në ambientet e brendshme të një lokali në rrugën “Ibrahim Rugova”. Dyshohet të ketë qëlluar me armë zjarri gjatë konfliktit ku mbeti i vrarë shtetasi F. G., dhe u plagosën shtetasit E. M., dhe E. H.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprat penale “Vrasje në rrethana të tjera cilësuese kundër dy ose më shumë personave, mbetur në tentativë e kryer në bashkëpunim” dhe “Prodhimi dhe mbajtja pa leje e armëve luftarake dhe municionit”, parashikuar nga nenet 79/dh, 25, 278 të Kodit Penal.
