Ngjarja e rëndë në Vaun e Dejës, pezullon nga detyra shefi i Komisariatit dhe dy policët

Një 47-vjeçar i ka dhënë fund jetës dje në Shkodër pak minuta pasi kishte dalë nga Komisariati i Policisë.

Ardian Kallami u gjet i vetëvarur ne banesën e tij në Barbullush në Shkodër, ndërsa familjarët hodhën dyshime se veprimi drastik i 47-vjeçarit kishte ardhur pas dhunës së ushtruar nga policia.

Shërbimi për Çështjet e Brendshme dhe Akuzat në Ministrinë e Brendshme nisën hetimet ku shkarkuan nga detyra, shtetasin me inicialet P.Ç., Shef i Komisariatit të Vaut të Dejës dhe punonjësit Z.D dhe P. Zh., me detyra SPZ (Specialist policor i zonës).

Njoftimi i policisë

Shkodër
Lidhur me ngjarjen ku u gjet i vetëvarur shtetasi A.K., 47 vjeç, i shoqëruar për disa orë në Polici si i dyshuar për vjedhje, sqarojmë se:

Pasi është vënë dijeni mbi ngjarjen Ministri i Brendshëm z.Fatmir Xhafaj ka urdhëruar Shërbimin e Çështjeve të Brendshme dhe Ankesave (SHÇBA) që në bashkëpunim me Prokurorinë të nisi një proces verifikimi dhe hetimi.

Pas verifikimeve paraprake ndaj punonjësve të Policisë të dyshuar si të implikuar me përgjegjësi, Ministri i ka kërkuar Drejtorit të Përgjithshëm shqyrtimin e çështjes me prioritet dhe marrjen e masave përkatëse deri në hetimin e plotë të ngjarjes nga Prokuroria e Rrethit Gjyqësor Shkodër.

Drejtori i Përgjithshëm i Policisë së Shtetit z.Ardi Veliu sot ka urdhëruar masën e pezullimit nga detyra, përkatësisht për P.Ç., Shef i Komisariatit të Vaut të Dejës dhe punonjësit Z.D dhe P. Zh., me detyra SPZ (Specialist policor i zonës).

Materialet përkatëse janë referuar pranë Prokurorisë së Rrethit Gjyqësor Shkodër, për ndjekje të mëtejshme penale konform ligjit.