Ish-prokurori Shkëlqim Hajdari deklaroi mbrëmjen e sotme në emisionin “Real Story” në “News 24”, se ligji “Antimafia” dështoi. Duke e argumentuar me fakte, ai tha se gjithçka dështoi, për shkak se prokurorët e gjykatësit nuk sekuestruan pasuri të paligjshme. Ligji “Antimafia” ka dështuar të prodhojë rezultate në sekuestrimin e pasurive të gjyqtarëve, prokurorëve dhe zyrtarëve të tjerë të lartë. Hetimet pasurore ndaj njerëzve të drejtësisë kanë qenë formale, dhe nuk kanë arritur të zbulojnë qoftë edhe një pronë të vetme, që rrjedh nga vepra penale e korrupsionit.
“Për të qenë të sinqertë, krimi i organizuar, nëse nuk i krijohen kushte, lehtësira edhe nga politika, nuk mund të lulëzoj. Unë kam punuar në Prokurori gjatë dhe kam punuar edhe në Prokurorinë kundër Krimit të Organizuar. Unë shpresoj që këtë herë të jetë nisur mirë.
Ligji “Antimafia” dështoi, sepse janë hetuar pasuritë dhe kanë dalë të ligjshme. Ai ishte një dështim spektakolar i Prokurorisë dhe Gjykatës. Mund të jetë e vërtetë që mund të jenë marrë para, ose kanë bërë lojëra politike. Ne kemi shkuar në shkatërrim total thuajse të ndjekjes penale. Inicimi i këtij akti normativ, është se merren vetëm me pasurinë e atyre që janë dënuar”, tha Hajdari.
Shkëlqim Hajdari nënvizoi se qeveria ka marrë një iniciativë të mirë, ndërsa shtoi se kjo iniciativë duhet të shikohet me vigjilencë. “Unë mendoj se qeveria ka marrë një iniciativë të mirë. Nëse do të shikojmë se tolerohen njerëz që kanë lidhje me qeverinë, ne duhet të jemi vigjilent. Në rast të kundërt, kjo është për t’u përshëndetur. Nga këtu fillohet për të shkuar atje ku publiku dëshiron. Do të flasin këta njerëz”, deklaroi ai.
