Sekretarja e Përgjithshme e Këshillit të Bashkëpunimit Rajonal, Majlinda Bregu shprehet se numri më i madh i ngacmimeve ndaj grave ndodh në rrjetet sociale dhe, sipas saj qeveritë duhet të marrin në konsideratë kuadrin ligjor për ndalimin e ngacmimit përmes internetit.
“Numri më i madh i ngacmimeve ndaj grave në internet po ndodh në rrjetet sociale dhe këto rrjete përdoren çdo ditë nga 45 për qind e qytetarëve të Evropës Juglindore. Qeveritë duhet të marrin seriozisht kuadrin ligjor për të ndaluar ngacmimet në internet pa kompromentuar lirinë e fjalës”, tha Bregu.
Komisioni Evropian kohët e fundit nisi një fushatë që kishte për qëllim vetëdijesimin për ngacmimet në internet ndaj grave dhe promovimin e praktikave më të mira në zgjidhjen e këtij problemi.
Me këtë rast, Komisionerja Evropian për Drejtësi e BE-së, Vera Jourova, theksoi se BE-ja dëshiron që “çdo grua të ketë lirinë e fjalës në internet pa asnjë frikë”.
“Ne nuk mund të qëndrojmë duarlidhur dhe të inkurajojmë individë që në mënyrë frikacake ngacmojnë gra dhe vajza në internet”, deklaroi ajo.
Ndër të tjera, Këshilli për Bashkëpunim Rajonal shpreh gatishmërinë që të ndihmojë qeveritë në rajon për të adresuar çështjen e ngacmimeve ndaj grave në internet.
