Duke nisur nga 4 janari, të gjithë punonjësit e administratës publike, supermarketeve dhe qendrave tregtare në Shqipëri duhet të paraqesin pasaportën e vaksinimit, atë të shërimit, ose tampon negativ çdo 5 ditë.
Ky është vendimi i marrë nga Komiteti Teknik, përpara mbylljes së vitit 2021. Ministria e Shëndetësisë në Shqipëri e ka botuar në Fletoren Zyrtare të shtetit vendimin për vaksinimin e punonjësve të administratës publike, punonjësve të marketeve dhe të qendrave tregtare.
Sipas urdhrit të firmosur nga ministrja Ogerta Manastirliu, punonjësit e këtyre institucioneve, më 4 janar 2022 duhet të paraqiten në punë me certifikatën e vaksinimit ose prova e testit PCR negative çdo 5 ditë.
“Punonjësit e administratës publike, punonjësit e supermarketeve dhe të qendrave tregtare, si një ndër kategoritë që rrezikohen dhe përbëjnë rrezik për të tjerët, me qëllim për të penguar përhapjen e infeksionit të shkaktuar nga Sars-Cov-2 (COVID-19), duhet të depozitojnë pranë qendrës së punës, duke filluar nga data 4.1.2022, certifikatë vaksinimi COVID-19, të lëshuar nga e-Albania, që vërteton vaksinimin e plotë, në formë digjitale apo të printuar, test PCR-je, çdo 5 ditë, të kryer sipas procedurës për kryerjen e testeve për efekte administrative, për të verifikuar që nuk janë mbartës të infeksionit Sars-Cov-2; certifikatë shërimi COVID-19 të lëshuar nga e-Albania ose dokument të lëshuar nga autoritetet shëndetësore të vendit, që provon shërimin nga infeksioni Sars-Cov-2, me vlefshmëri deri në 6 muaj pas shërimit”, thuhet në urdhrin e publikuar në Fletoren Zyrtare.
