Jo më larg se dje, Rama tha se është detyruar të marrë në mbrojtje deputetët e PS, pasi u dërgohen mesazhe nga të dënuar në burgun 313 në Tiranë. Kjo çështje nuk i ka shpëtuar ish-ministrit të Drejtësisë, Ylli Manjani, i cili parashtron dy pyetje.
Në formë ironie, ai pyet se nëse të burgosurit dërgojnë mesazhe kërcënuese, nga i marrin ata aparatet celularë?!
Kjo çështje ngre shumë pikëpyetje, pasi në ambjentet e burgut nuk lejohen celularët.
Por ai nuk e ka lënë me kaq. Kërkon të dijë nga kryeministri se nga i dinë të burgosurit numrat e deputetëve.
Nëse ata janë kaq të informuar sa të dinë numrat, kjo përkthehet në konfidencë, gjë që lë shteg për shumë hamendësime. Nga foltorja e Kuvendit, Rama konfirmoi se deputetët socialistë janë kërcënuar nga të burgosur, kjo për të mos votuar ligjin që parashikon mbylljen e lojërave të fatit.
