Policia ka publikuar pamjet nga momenti i ndjekjes dhe arrestimit të 49-vjeçarit, që hodhi lëndë plasëse në protestën e Teatrit.
Autori Arben Qyrani, me banim tek Unaza e Re është filmuar që në momentin kur ka hedhur shashkën, e deri kur është larguar i maskuar nga protesta.
Siç shihet edhe nga pamjet, autori është larguar nga grumbullimi i njerëzve duke mbuluar kokën me një triko për të mos u identifikuar.
Por 49-vjeçari është kapur vetëm disa metra më larg nga policia. Si pasojë e lëndëve plasëse të hedhura në protestë, mbetën të lënduara 2 qytetare.
Njoftimi i policisë:
Policia e Shtetit ka identifikuar dhe ndaluar 49-vjeçarin Arben Qyrani, me banim tek Unaza e Re, Tiranë, autori i hedhjes së lëndëve pirotenike në tubimin e sotëm.
Për pasojë pati 2 shtetase të lënduara nga lënda plasëse, jashtë rrezikut për jetën.
Pasi hodhi lëndët piroteknike mes turmës, i ndihmuar nga persona të tjerë, të identifikuar tashmë nga Policia, ai doli nga turma.
Agjentët e policisë e ndoqën dhe e ndaluan pak metra larg sheshit ku opozita mbante tubimin.
Qyrani është i proceduar edhe më herët për “Tubim të paligjshëm” në vitin 2018, në zonën e Unazës së Re, në Tiranë.
