OFL ka zbarkuar në Korçë, teksa u ka dërguar formularin e deklarimit të pasurisë 4 të dënuarve për drogë dhe grabitje. Në shënjestër janë: Ilir Hamzallari, banues në Korçë, dënuar për veprën penale “Vjedhja me dhunë”, kryer në bashkëpunim. Ai është një nga të rinjtë që grabiti kasafortën me 100 milionë lekë në muajin dhjetor të 2017, në fshatin Bulgarec të Korçës.
Arshim Pilinçi dhe Orlind Pilinçi (vëllezër), banues në Korçë, të dënuar për veprën penale “Prodhimi dhe shitja e narkotikëve”. Mësohet se Arshim Pilinci, 24-vjeç dhe Orlind Pilinçi janë djemtë e ish-kryetarit të fshatit Podgorie, Arben Pilinci.
Marjus Lako, banues në Korçë, dënuar për veprën penale “Prodhimi dhe shitja e narkotikëve”, kryer në bashkëpunim.
Personat në fjalë duhet t’u përgjigjen me shkrim, brenda 48 orëve të gjitha pyetjeve të OFL-së. Përgjigjet e marra do t’i dërgohen SPAK-ut, për veprime të mëtejshme.
Njoftimi i policisë
OFL, 20 gusht
Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
- I. H., banues në Korçë, i dënuar për veprën penale “Vjedhja me dhunë”, kryer në bashkëpunim;
- A. P., banues në Korçë, i dënuar për veprën penale “Prodhimi dhe shitja e narkotikëve”;
- O. P., banues në Korçë, i dënuar për veprën penale “Prodhimi dhe shitja e narkotikëve”;
- M. L., banues në Korçë, i dënuar për veprën penale “Prodhimi dhe shitja e narkotikëve”, kryer në bashkëpunim.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
