Ndonëse ndodhet në burg, Stresi e ka gjetur mundësinë për të ndarë një foto me ndjekësit. Do të ishte e pamundur që ai të dispononte një aparat celular në qeli. Por mesazhin e radhës ai është kujdesur ta ndajë me fansat e tij.
Me gjasë, dikush është futur me kërkesën e tij në profilin e tij zyrtar, teksa shpreh entuziasmin për këngën e tij të re.
Sikundër duket edhe nga fotoja në fjalë, kënga e tij më e re me të cilën u paraqit në “Kënga magjike”, ka marrë më shumë se 1 milion klikime.
Reperi është lënë në burg, pas arrestimit në një hotel në Linzë ku iu gjet armë dhe një sasi lënde narkotike.
Nga shqyrtimi rezultoi se përgjimet që janë përdorur si provë ndaj Stresit, kryheshin nga Prokuroria e Krimeve të Rënda. Këto për llogari të të ashtuquajturit grupi i Bajrit në Shkodër.
Stresi, gjatë një komunikimi telefonik është shprehur se “atë e hodha sapo pashë që erdhën të zinjtë”.
Sipas prokurorisë, Stresi në këtë bisedë i referohet pistoletës që policia gjeti në një lokal pranë gjimnazit “Partizani” në korrik të këtij viti.
Avokati i tij ka kundërshtuar të dyja rastet. Ai pretendon se policia në asnjë rast nuk i ka gjetur pistoletë në trup klientit të tij.
Madje, për arrestimin e fundit, avokati ka shfrytëzuar pamjet e publikuara nga policia.
“Mediat kanë transmetuar pamjet e arrestimit të klientit tim thuajse nudo. Atëherë, unë pyes se ku e ka patur armën klienti im.
Pasi armëmbajtja pa leje nënkupton të ta gjejnë armën ty. Ai ishte lakuriq”.
