Gjatë viteve të fundit, porti i Durrësit është kthyer në një “strehë” për trafikantët. Lënda narkotike shpesh fshihet në kamionët me banane. Por tashmë trafikantët kanë ndryshuar strategji. Një tjetër sasi kokaine është gjetur brenda dy çantave në portin e Durrësit, e që vinte nga Kolumbia.
Një sasi e konsiderueshme prej mbi 50 kg kokainë është zbuluar në orët e para të mëngjesit të kësaj të marte, e cila ishte vendosur në një anije me qymyr që vinte nga Kolumbia.
Kokaina është kapur në hambarin e anijes “Unistream” me flamur të Antigua Barbuda nga Ishujt Karaibe, shkruan “shqiptarja”. Ajo ishte e ndarë në 53 pako, në 2 çanta dhe deri më tani bëhet fjalë për 50 kg, teksa kontrolli do të vijojë sërish rreth orës 10:00, pasi droga ishte futur mes qymyrit. Policia bëri kontroll me qen antidrogë, por nuk e pikasën kokainën, për pasojë do të kontrollohet gjithë sasia e qymyrit prej 6500 ton.
Kapiteni i anijes është nga Rusia, teksa deri tani nuk ka persona të ndalur. Kanë qenë partnerët ndërkombëtar që kanë sinjalizuar policinë shqiptare për sasinë e drogës. Më pas është kryer edhe operacioni nga Task Forca e Durrësit, që ka zbuluar kokainën në anijen që sillte qymyr nga Kolumbia.
