Plani i qeverisë për rikthimin e skemës së tarifimit me 2 blloqe çmimin e energjisë, do të përkthehet në shpenzime më të larta për një numër të konsiderueshëm abonentësh.
Këtë dimër, faturimi do të bëhet me fasha, kush shpenzon mbi 800 kilovat do të paguajë më shtrenjtë. Nën këtë vlerë do paguhet 9.5 lekë/kilovat. Shtrenjtimi i energjisë për familjet që konsumojnë mbi 800 kwh do të prekë gati 48 500 familje.
KESH (Korporata Elektroenergjitike Shqiptare) ka kërkuar sensibilizim ndaj familjeve që të fikin 2 llamba për 4 orë në mënyrë që të kursehet energjia elektrike, dhe kostoja që duhet të paguajnë në fund të muajit.
Sipas KESH, kjo do të sillte 654 lekë më pak në faturë dhe do të kursente 3,500 MWh dhe 39,3 milionë lekë në vit.
“Kursejmë energjinë që ta kemi! Sa herë që kursen energji, ti ke kursyer para! Fikni 2 llamba për 4 orë, çdo ditë dhe kjo do të përkthehet në 58.4 kWh të kursyer në vit dhe 654 lekë më pak në faturën tuaj. Sikur këtë veprim ta kryejë çdo familje e një qyteti në vend, do të kursehej mesatarisht 3,500 MWh dhe 39,3 milionë lekë në vit, ndërsa sistemi energjetik do të kursejë nga kostot e importit në kushtet e sotme, mesatarisht 307 milionë lekë në vit për çdo qytet”, shkroi KESH në një postim.
Energjia me fasha u mor për të përballuar krizën globale të energjisë, që ka sjellë çmime stratosferike për megavat.
