Disa dyshime mbi transaksionet e organizatës së ish-presidentit Donald Trump, kanë bërë që prokurorët në Manhatan të shqyrtojnë mundësinë e ngritjes së akuzave penale ndaj tij. Gazeta “New York Times” ka shkruar se akuzat mund të ngrihen që në fillim të javës tjetër lidhur me përfitimet që kompania u ofron drejtuesve të lartë, si apartamente, makina e pagesa për studimet universitare apo në shkolla private.
“Nëse ngrihen akuza të tilla, janë tërësisht absurde dhe të pashembullta. E gjithë kjo po bëhet vetëm për t’u hakmarrë ndaj Donald Trumpit”, është shprehur avokati i organizatës Trump, duke deklaruar se do të kërkohet pafajësia dhe do të paraqitet kërkesë që akuzat të mos merren parasysh për hapje procesi gjyqësor.
“New York Times” shkruan se zyra e Prokurorit të Distriktit në Manhatan, nuk ka pranuar të bëjë komente. Deri tani procesi i gjatë hetimor nuk ka rezultuar në akuza. Prokurorët të cilët kanë kohë që analizojnë dokumentacionin fiskal të ish-presidentit, kanë paraqitur urdhra gjykate për nxjerrjen e dokumenteve dhe kanë intervistuar dëshmitarë që kanë punuar nga afër me ish-presidentin si dhe drejtues të kompanisë.
Zyrtarë të rendit që janë në dieni të procesit, thonë se hetimet kanë arritur një pikë kritike. Procesi hetimor është përqëndruar pjesërisht tek shefi i financave të organizatës Trump, Allen Weisselberg. 73-vjeçari Weisselberg është në vëmendje, pasi janë ngritur pikëpyetje për faktin se i biri ka përdorur një apartament në pronësi të kompanisë Trump me kosto të ulët ose falas, si dhe ka pikëpyetje për pagesat e shkollimit në institucione private për nipat e zotit Weisselberg. Praktika e shpërblimit të punonjësve më të vlerësuar me dhurata të çmueshme nuk është e paligjshme, por në shumë raste këto dhurata taksohen si pjesë e të ardhurave të individit.
