Në një konferencë të përbashkët me kryeministrin Rama, Komisioneri për Zgjerim në Bashkimin Evropian, Oliver Varhelyi, u shpreh se i gjithë procesi i zgjerimit ka të bëjë me sigurinë e Ballkanit. Nga ana tjetër, zyrtari i lartë i BE-së tha se vlerëson në maksimum durimin e shqiptarëve.
“Unë e vlerësoj durimin e Shqipërisë. Kërkoj pak durim nga ana juaj, sepse objektivi ynë është që ky proces të mbyllet brenda presidencës franceze. Çështja e vërtetë ka të bëjë me anëtarësimin e Shqipërisë në BE.
Ne duhet të punojmë për integrimin e vërtetë në terren. Kjo nuk ka të bëjë vetëm me procesin, por ka të bëjë më mënyrën si ne do ta ndryshojmë realitetin në terren. Kjo është detyra që kemi, dhe nuk duhet ti largojmë sytë nga ky angazhim i përbashkët. Do të shkoj në Shkup dhe Sofje nëse do të ishte e nevojshme. Duhet ta mbyllim këtë punë tani.
Do të thosha që nuk është Shqipëria ajo me të cilët po tallet njeri. Nëse ne nuk e vendosim për këtë gjë, ne po tallemi me veten. Pra BE po tallet me veten. Kjo është një fjalë e rëndë për të thënë, prandaj nuk po e them këtë.
Ajo që do të them është kjo: Që ne mund të promovojmë arritjet e secilit prej shteteve kandidate. Vendimet nuk i kemi ne në dorë. Vendimin e kanë në dorë shtetet anëtare”, tha komisioneri.
E ndërsa kryeministri Rama nënvizoi ndër të tjera se vendi ynë nuk ka lënë asnjë detyrë pa përmbushur, dhe BE duhet të hapë negociatat. “Kjo nuk është një çështje që lidhet me çfarë kemi bërë ne, apo nuk kemi bërë ne Shqipëria, por lidhet me ngërçin e krijuar nga vetoja e Bullgarisë ndaj Maqedonisë së Veriut. Ne jemi në një kurs që e ka përcaktuar pozicionin tonë si një pozicion konstruktiv, dhe të lidhur me pozicionin e Maqedonisë së Veriut”.
Kryeministri bëri të ditur se nëse negociatat nuk hapen në qershor, atëherë Shqipëria do të kërkojë ndarjen nga Maqedonia e Veriut, e cila ka problem me Bullgarinë.
“E informova dhe me faktin që ne e kemi kryer këshillimin me qytetarët shqiptarë që nëse do ishin dakord me rastin që pas 6-mujorit të përfundimit të presidencës franceze, gjendja mbetet e pandryshuar, Shqipëria të ndryshojë kursin dhe të kërkojë haptazi ndarjen nga Maqedonia e Veriut. Por kjo mbetet për t’u përcaktuar si qasje pas kësaj mbledhje të Këshillit të Europës”.
“Komisioneri më ka konfirmuar sot dhe ka qenë mbështetës i përfshirjes së Korridorit të 8 në rrjetin evropian, por pas këtij udhëtimi nga Shkupi në Tiranë me makinë është edhe më i bindur që kjo është gjëja e duhur”.
