Presidenti Ilir Meta, ka pritur ditën e sotme në një takim Sekretarin Parlamentar të Shtetit në Ministrinë Federale të Drejtësisë të Gjermanisë, Christian Lange.
Përmes një postimi në Facebook, Meta shprehet se ka besim në mbështetjen e Gjermanisë për integrimin e Shqipërisë në BE.
Sipas Metës, në mënyrë që Shqipëria të marrë një përgjigje pozitive në 17-18 tetor, palët politike duhet të dialogojnë dhe ta lënë mënjanë qasjen antagoniste.
Postimi i plotë:
Kënaqësi të takoja sot Sekretarin Parlamentar të Shtetit në Ministrinë Federale të Drejtësisë dhe Mbrojtjes së Konsumatorit, njëkohësisht deputet i SPD në Bundestagun gjerman, z. Christian Lange.
Besim në mbështetjen e Gjermanisë për të ardhmen europiane të Shqipërisë dhe për forcimin e mëtejshëm të marrëdhënieve dypalëshe strategjike ndërmjet dy vendeve.
Duke inkurajuar një vendim pozitiv të Këshillit Europian të 17-18 tetorit 2019 për çeljen e negociatave të anëtarësimit të Shqipërisë me BE, shpreha bindjen se qasja antagoniste ndërmjet palëve duhet të marrë fund sa më shpejt, për t’u zëvendësuar nga dialogu konstruktiv dhe respektimi i ndërsjellë i Kushtetutës dhe shtetit të së drejtës.
