Ish-ministrja e Mbrojtjes, Mimi Kodheli u shpreh se duhet të jemi krenarë për çfarë kemi arritur, pasi, sipas saj nuk shkojmë në Evropë si “lypsarë apo qytetarë të dorës së dytë”.
E ftuar në “RtvOra”, Kodheli deklaroi se Shqipëria i ka bërë gjërat mirë dhe për këtë arsye jemi në një pozicion fitues.
“Është një moment i vështirë për shumëkënd. BREX-it, rikonceptimi i Macron për një Evropë tjetër, i komplikon gjërat. Duhet të jemi krenarë dhe për arritjet tona. Ne nuk shkojmë në Evropë si lypsarë, apo qytetarë të dorës së dytë. Ne shkojmë me traditën tonë.
Evropa ka qenë e turbullt edhe në vendimmarrje të tjera të rëndësishme dhe nuk ka qenë domosdoshmërisht ajo që i ka prerë drutë shkurt.
Ne do bëjmë përpjekjen tonë duke pasur miq të mirë që është Evropa dhe një perëndim më i largët akoma. Vlerat tona i shtohen atyre Evropiane.
Ne jemi në një pozicion fitues se i kemi bërë gjërat mirë. Bundestagu ka qenë i qartë, ka pasur një ekspertizë të thellë për të na shtruar në tryezë dy gjëra për ta kapërcyer krizën. Këto kanë qenë Gjykata Kushtetuese dhe Kodi i ri zgjedhor”, theksoi Kodheli.
