Kryebashkiaku i Selanikut, Janis Butaris ka bërë një deklaratë të fortë lidhur me çështjen e emrit të Maqedonisë.
Në një intervistë për gazetën Kurir, Butaris pretendoi se emri i Maqedonisë mund të ndryshojë, teksa tha se për kryeministrin Zaev emrat “Republika e re e Maqedonisë”ose “Maqedonia Veriore” janë të pranueshëm.
“Kryeministri i ri Zoran Zaev nuk ka ide nacionaliste si paraardhësi i tij Nikola Gruevski, i cili ishte një fatkeqësi e tmerrshme për vendin. Zaev dëshiron një kompromis për emërimin: Republika e Re e Maqedonisë ose Maqedonia Veriore”, deklaroi ai.
Më tej, Butaris tha se nuk do e pranojë kurrë emrin “Republika e Maqedonisë”.
Deri më tani ka pasur disa takime për negociata mes diplomacisë maqedonase dhe greke, të cilat janë zhvilluar nën praninë e Kombeve të Bashkuara.
Ajo që bie në sy është fakti se diplomacia maqedonase nuk përfshiu as edhe një përfaqësues të komunitetit etnik shqiptar në këtë proces.
Janis Butaris, siç shkruan “Kurir”, konsideron se me emrin e ri Maqedonia mund të gjejë identitetin e ri për vendin dhe për qytetarët dhe se me zgjidhjen e emrit do të hapet rruga drejt NATO-s.
Nuk dihet nëse Zaev e ka pranuar vërtet ndryshimin e emrit të Maqedonisë, teksa ky mund të jetë një kompromis për hir të integrimit të Maqedonisë.
