Për të dytën ditë me radhë, Wuhani që ishte epiqendra e shpërthimit të pandemisë nga koronavirusi, nuk ka raportuar infeksione të reja.
Në të gjithë Kinën, Komisioni Kombëtar i Shëndetësisë njoftoi për 39 raste të tjera të infeksionit të importuar nga jashtë vendit dhe për 3 vdekje, përfshirë 2 në provincën e Hubei dhe një në provincën Liaoning.
Po e njëjta situatë nuk shfaqet në Itali. Kryeministri italian Giuseppe Conte do i duhet që të marrë vendime të reja, pas disa propozimeve të ardhura nga guvernatorët e rajoneve të vendit. Propozime të cilat konsistojnë në ashpërsimin e masave, në përgjigje të emergjencës prej epidemisë.
Pas kërkesave për reduktim të orarit të shërbimeve në supermarkete dhe pezullim të aktiviteteve sportive në natyrë, dhe teksa ushtria është zyrtarisht në rrugë në Campania dhe Siçili, guvernatori venecian Luca Zaia ka kërkuar të monitorohen lëvizjet e qytetarëve përmes telefonit celular, ide kjo e bërë realitet në Kinë, Kore dhe Izrael.
Italia ka më tepër viktima se Kina nga koronavirusi, edhe pse ka një popullsi 22 herë më të vogël. 427 pacientë humbën jetën 24 orët e fundit, duke e çuar 3 405 numrin e përgjithshëm të viktimave nga koronavirusi në Itali.
