Kryeministri Rama zbuloi gjatë mbledhjes së Grupit Parlamentar, se pse u përzgjodh emri i Bajram Begajt për në Presidencë dhe argumentet që çuan në skualifikimin e alternativave të tjera. Kreu i qeverisë sqaroi përse u përjashtua emri i Fatos Nanos, ku sipas tij, në këtë fazë PS ka barrën të jetë partia e të gjithëve. Rama tha se kishin përjashtuar emrat politikë, si edhe ata që vinin nga Partia Socialiste, pasi kjo forcë duhet të përfaqësojë të gjithë shqiptarët.
“Drejtimi i dytë ishte drejtimi që adresonte mundësinë për kandidatura që nuk janë anëtarë të grupit të PS, por që kanë një kontribut domethenës në jetën e partisë. Që nga kryetari i partisë Fatos Nano dhe me radhë të tjerë për të cilët kemi respektin më të madh. Por përsëri për arsyet e thëna publikisht, e pamë të arsyeshme që dhe këtë drejtim ta përjashtojmë nga mundësia e përzgjedhjes, sepse në këtë fazë PS ka barrën të jetë partia e të gjithëve.
Kështu rezonuam te grupi i tretë, ku grupi kishte vënë në funksion të këtij procesi 26 kandidatura me gra dhe burra të nderuar, me profile të ndryshme. Që nga profilet e jetës publike e akademike deri te drejtimi që vinin nga anë të tjera politike. Pas diskutimit, duke ruajtur respekt për të gjithë personat, pavarësisht se mbledhja ishte e mbyllur, u ruajt respekti për të gjithë personat që dhe pa dijeninë e tyre fare ishin përfshirë në atë diskutim. Në fund patëm 6 kandidatura që morën më shumë kohë për t’u shoshitur, pastaj konsensualisht duke dëgjuar me vëmendje ato që u thanë, konsensualisht u arrit në konkluzionin që të vinim sot në grup dhe të propozonim këtë kandidaturë”, u shpreh Rama.
