Real Madrid është në krizë zyrtarisht, humbja e thellë 5-1 nga Barcelona ka tronditur kampin e “Los Blancos”. Menjëherë pas ndeshjes, radio spanjolle “Estadio” ka thënë se Julen Lopetegui pritet të shkarkohet nga detyra në orët e ardhshme.
“Mund të themi se në orët e ardhshme do të shkarkohet Lopetegui. Klubi do ta zëvendësojë atë me Antonio Conten dhe do ta prezantojë nesër në ora 13:00”, thotë Radio Estadio.
Ndërsa trajneri Lopetegui pas ndeshjes u shpreh se: “Një humbje është gjithmonë e vështirë, aq më shumë në shtëpinë e Barcelonës. Por kishim raste të pastra për të barazuar ndeshjen e për të ndryshuar fatin e saj. Kjo është një skuadër me probleme por rezultati përfundimtar nuk reflekton realitetin e ndeshjes.
Nëse nuk kam dhënë dorëheqjen deri tani, atëherë mos e prisni. Unë thjesht dua të rrit moralin e lojtarëve të mi. Edhe një herë nuk kemi marrë atë që meritonim. Unë kam besim te ky ekip e këta lojtarë.
Jam i trishtuar, si të gjithë në dhomat e zhveshjeve, por kam forca për të reaguar. Jam trajneri, jemi në tetor, është një goditje e rëndë por kam forcë. Situata mund të përmbyset, pasi ka kohë dhe ne kemi cilësi. Na kanë prishur punë dëmtimet, ka lojtarë të tjerë të cilët tani po vijnë në formë. Unë kam forcë për të drejtuar ekipin, për këtë nuk kam asnjë dyshim.
Në fund nuk jam unë që marr vendimet. Kam shpjeguar atë që mendoj dhe besimin që kam në këtë ekip. Pjesa tjetër nuk është përgjegjësia ime”, u shpreh Lopetegui.
