Është akoma i freskët sulmi që u bë ndaj Ernest Gjokës me thikë në Shkodër, sapo kishte përfunduar seancën stërvitore në fushën sportive “Reshit Rusi”. I riu, Nehat Fojleta, tashmë pas hekurave dhe i dënuar me masën “arrest me burg”, sulmoi trajnerin.
Por historia e kërcënimeve nuk ka mbaruar, pasi pas Gjokës një tjetër trajnerë është kërcënuar në Shkodër. Trajnerit të Vllaznia B, Ervis Kraja, i kanë shpuar gomat e makinës. Kraja është shprehur se nuk ka konflikte me njeri dhe për rrjedhojë s’ka asnjë dijeni se kush mund të jetë autori i këtij akti vandal.
“Nuk e di çfarë prapaskene mund të ketë kjo ngjarje. Nuk kam konflikte, nuk e kuptoj pse e kanë bërë. Jashtë futbollit jam i qetë, nuk kam problem”, është shprehur trajneri i Vllaznia B, Ervis Kraja. Kraja ishte i pari i cili u solidarizua me rastin e Ernest Gjokës, i cili u sulmua me thikë nga një person gjatë seancës stërvitore.
