Pas tre ditësh të zymta, orvatjesh të shumta, një lajm i mirë erdhi për Ejsin e vogël e cila është në luftë me jetën. Sakrificat duket se u shpërblyen dhe falë donatorëve që nuk kanë lënë asnjëherë në baltë rastet nga më kritiket, ku kanë bërë të mundur transportimin drejt Italisë të Ejsi Ballës, e cila i ka të bllokuara të dyja veshkat.
“Fundjavë Ndryshe” ia arriti të çojë misionin në fund, për të shpëtuar këtë ëngjëll të vogël, e cila po transportohet drejt Italisë. Drejtori ekzekutiv i fondacionit “Fundjavë Ndryshe”, Arbër Hajdari, ka ndjekur hap pas hapi rastin e së voglës, ku së bashku me stafin, ia dolën për ta transportuar drejt Italisë, pasi në Shqipëri shpresat ishin inekzistente.
Ejsi ka bërë një ndërhyrje për apandesitin, dhe si pasojë e një bakteri i janë bllokuar të dyja veshkat. Arbër Hajdari tha se këto kanë qenë tre ditët më të vështira, më të ngarkuara, kjo edhe për shkak se parametrat e vajzës ndryshonin dhe asgjë nuk kishte siguri për transportin jashtë vendit. Falenderimet shkojnë për mjekët, por edhe për Policinë e Shtetit, për të asistuar që të mos ketë asnjë sekondë vonesë për udhëtimin e saj.
“Mirëmëngjesi! Kjo fundjavë ka qënë një sfidë e jashtëzakonshme për Ejsin, vogëlushen 4 vjeçare e cila lufton me jetën nga dita e premte. I gjithë stafi i “Fundjavës” ka qënë i angazhuar për të gjetur avion sanitar dhe për të dërguar vogëlushen në një spital të specializuar.
Ka qënë shumë e vështirë për shkak të ngarkesës së avionave sanitar, por edhe për shkak të parametrave jetësor të ulta të vajzës. Desh Zoti që parametrat të ngriheshin dhe sot, sapo është ulur në aeroport avioni sanitar i cili me një ekip të specializuar do të bëjnë të mundur nisjen e vajzës jashtë vendit! Ka qënë një fundjavë shumë e vështirë. Faleminderit nga zemra të gjithë bamirësve. Faleminderit mjekëve shqiptar që kanë bërë të pamundurën! Zoti qoftë me Ejsin”.
