Vrasja e gjeneralit Iranian ka rritur tensionet ndjeshëm në lindjen e Mesme. Irani ka premtuar hakmarrje, deklarata të cilat janë komentuar me nota tallëse nga presidenti Trump ditën e djeshme.
Në prag të një lufte të re, Trump është shprehur se SHBA-ja është e përgatitur për çdo skenar. Sipas tij, vrasja e gjeneralit iranian u bë vetëm me një qëllim, shmangien e një lufte të mundshme.
Presidenti amerikan e bëri deklaratën për mediat nga Mar-a-Lago, Florida, ku konfirmoi se ai udhëzoi ushtrinë e Shteteve të Bashkuara për të kryer goditjen ajrore që vrau “terroristin numër një në botë”, Qassem Soleimani.
Presidenti Trump informoi se Soleimani po përgatiste sulme ndaj diplomatëve amerikanë dhe personelit ushtarak.
“Nëse do të kërcënohen amerikanët, kudo që të ndodhen, ne i kemi të identifikuara objektivat dhe unë jam gati dhe i përgatitur për të ndërmarrë çdo veprim të mundshëm”, tha Presidenti Trump.
