Presidenti serb Aleksandar Vuçiç, ka zbuluar prapaskenat nga takimi në Uashington, ku firmosi marrëveshjen me kryeministrin e Kosovës, Avdullah Hoti, në praninë e presidentit Donald Trump. Vuçiç ka zbuluar se përgjegjësia që kishte, ishte shumë e madhe, e po kështu edhe tensioni ishte shtuar. Ai ka treguar ndër të tjera se së bashku me ekspertët, nuk kanë fjetur gjatë gjithë natës, ndërsa kishin përgatitur çdo detaj të mundshëm.
“Amerikanët dhe gjermanët krijuan Kosovën, jo zviceranët, natyrisht. Unë e di se si duken bisedimet në Shtëpinë e Bardhë. E di se çfarë presioni kishte mbi ne dhe ata. Mjafton që ata të thonë; ne do të tërheqim forcat tona nga Kosova dhe ata (shqiptarët) do të bien dakord për gjithçka.
Në Washington, mund të ulesha në dysheme, sepse e dija se për çfarë luftoja, për vendin tim. Ne nuk fjetëm natën, përgatitëm çdo detaj. Bëmë një punë të mirë për vendin.
Ne ruajtëm dinjitetin e vendit, dhe treguam se Serbia pas 30 vjetësh mund të respektohet në Amerikë. Ne nuk shkuam për një fitore të madhe, sepse ato janë arritur në luftë. Ne shkuam për një fitore të vogël, pasi ato arrihen në paqe”, ka thënë Vuçiç.
