Kryetari i Grupit Parlamentar të Partisë Socialiste, Taulant Balla ka shpërndarë mesazhin e ambasadës amerikane, e cila mbështet votimin në Parlament të dy anëtarëve të rinj të Gjykatës Kushtetuese.
Përmes një postimi në “Facebook”, numri dy i PS-së nënvizoi se sot Kuvendi i dha përgjigje kujtdo që është përpjekur këto tre vite ta pengojë zbatimin e Reformës në Drejtësi.
“Në krahun e duhur të historisë, në ngritjen e institucioneve të reja të Drejtësisë, në rrugën Europiane të Shqipërisë.
Sot Kuvendi përmes votës së 105 deputetëve, pas propozimeve të Këshillit të Emërimeve në Drejtësi, përmbylli procesin e zgjedhjes së dy anëtarëve të rinj të Gjykatës së re Kushtetuese. Tashmë me pesë anëtarë Gjykata Kushtetuese.
Sot mori përgjigjen e fortë (të radhës) nga Kuvendi kushdo që është përpjekur prej tre vitesh ta pengojë zbatimin e Reformës në Drejtësi”, shkroi Balla.
