Policia e Shkodrës ka prangosur pasditen e sotme, të ashtuquajturin “të fortin” e qytetit, Bledar Cafi. Cafi është arrestuar nga policia e Shkodrës për llogari të shtetit italian pasi dyshohet si pjesëmarrës në organizatë kriminale dhe trafikim lëndësh narkotike.
Autoritetet italiane kanë kërkuar ekstradimin e tij. Ai është përmendur disa herë për ngjarje të ndryshime kriminale, kryesisht të përqëndruara në veri të vendit, në zonën e Shkodrës.
41-vjeçari është akuzuar për vrasjen e Shyqyri Mustafajt në vitin 2001, por nuk është shpallur kurrë i fajshëm pasi hetuesit nuk kanë gjetur mjaftueshëm prova për ta ndëshkuar.
Disa vite më parë, ai u prangos nga oficerët e Interpolit në Lyon të Francës, pasi ndaj tij ishte lëshuar një udhër-arresti ndërkombëtar, dhe u ekstradua në Shqipëri. Cafi akuzohej për disa vepra penale, si vrasje, përdorim armësh dhe eksplozivi në mënyrë të paligjshme.
Më herët, Operacioni Forca e Ligjit u dërgoi formularin vëllezërve Cafi për justifikimin e pasurisë, pasi kanë disa biznese në qytetin e Shkodrës.
