Mbrëmjen e së premtes erdhi për publikun shqiptar spektakli i përvitshëm “Krishtlindje në Tiranë”. Emrat e njohur të muzikës shqiptare sollën atmosferën e Krishtlindjeve, në shtëpitë e të gjithë shqiptarëve.
Nën drejtimin e producentit Sokol Guga e Manjola Nallbanit, edicioni i gjashtë erdhi me përmasa të jashtëzakonshme. E veçanta e këtij edicioni ishte ardhja e popstar-it italian Alex Palmieri dhe aktores Ornella Muti.
Producenti Guga ndau me shikuesit e emisionit ‘Rudina’ disa momente pikante të ardhjes së aktores, pasi siç e tha dhe ai, kushtet e saj ishin tejet të larta. Diva me famë ndërkombëtare kishte kërkesa shumë të larta, duke përfshirë edhe masazhierin e saj personal, gjatë qëndrimit të saj në Tiranë.
Masazhieri i shkonte në hotel, në dhomë. Pra, sa herë ajo vinte nga një udhëtim apo drekë që kishin organizuar, donte masazhierin e saj personal. Dhe nuk kishte diskutim që edhe të qëndronte në një hotel me 5 yje.
“Unë kisha 3 vite që komunikoja me të, sigurisht që ajo nuk e kishte në axhendën e saj për ardhur 3 vite më parë, e shtymë dhe ky ishte viti ideal për të qenë ajo në Tiranë.
E pranoi me shumë kënaqësi ftesën. Unë i thashë që nëse do të duhet të dërgoj një charter privat, do ta bëj dhe këtë. Unë të dua në Tiranë, shqiptarët të duan, ne i kemi adhuruar filmat tuaj. Unë kam qenë ende i vogël, por në fillim të viteve 90-të të gjithë shqiptarët e shikonin Ornella Muti-n, ishin të dashuruar me të”, tha Guga.
“Ornella Muti është një artiste jo aq e lehtë për t’u marrë dhe për t’u përshtatur me të. Ishte një artiste që kishte kërkesa shumë të larta. Por të paktën në kontratën që ne kemi bërë, ajo kërkonte që të kishte masazhierin e saj personal, gjatë qëndrimit të saj në Tiranë.
Gjë që për ne ishte pak habi. Ne 4 gjëra kërkonim ne shqiptarët, ajo 24. Masazhieri i shkonte në hotel, në dhomë. Ajo sa herë që vinte nga një udhëtim apo drekë që kishim organizuar, donte masazhierin e saj personal. Hotelin duhet ta kishte me 5 yje patjetër“, tregoi ai më tej.
