Dy sfidat e radhës eliminatore për në “Euro 2020” kombëtarja shqiptare i ka ndaj Turqisë dhe Andorrës. Trajneri Edi Reja ka grumbullua disa lojtarë të rinj për t’i parë nga afër, ndërkohë që pret fundjavën të mbyllen kampionatet kryesore për të ardhur baza e skuadrës. Qendërmbrojtësi i Cosenzas Kastriot Dermaku, ka merituar ftesën e trajnerit të ri duke parë paraqitjet që ka bërë gjatë sezonit në Itali dhe pritet që të jetë titullar. Ai ka folur në konferencën për shtyp pas seancës stërvitore, përkrah Migjen Bashës.
“Me Cozencan kemi luajtur me katër edhe tre mbrojtës. Ndihem mirë në të dyja sistemet e lojës. Të shohim çfarë mendon trajneri, cili do jetë moduli më i mirë me grupin që ka në dispozicion. Duhet të japim maksimumin, të marrim pikë dhe të shohim deri ku mund të mbërrijë kjo kombëtare. Të gjitha ndeshjet janë të vështira, por me rëndësi është që ta japim maksimumin”, tha Dermaku.
Shtatlarti flet edhe për konkurrencën në mbrojtje të kuqezinjve, ku shprehet se do të japë maksimumin dhe nuk pret të jetë titullar në këto sfida. Ai ka folur edhe për ndryshimin mes Rejas dhe Panuccit, ku është shprehur se tani kanë më shumë liri.
“Konkurrenca është e madhe dhe është pozitive. Nuk pres me qenë titullar, do jap maksimumin. Nëse më jepet shansi do kërkoj të jap më të mirën time. Nuk e di me kë dua të luaj. Me rëndësi është të luaj, me këdo. Me rëndësi është të kem minuta dhe të tregoj veten. Nuk jemi grumbulluar të gjithë që të jap një gjykim të rëndësishëm. Tani ka më shumë liri. Javën tjetër do jetë ndryshe. Mendimi për momentin është pozitiv”.
Dermaku ka zhvilluar një sezon mjaft të mirë me Cosenzan dhe ofertat për të tani nuk mungojnë. Ai ka konfirmuar se është në bisedime me disa skuadra dhe sezonin e ardhshëm me shumë mundësi do të luaj në Seroe A.
“Kemi biseduar me disa ekipe. Kontrata më mbaron në qershor. Ka shanse të luaj në Serie A. Më pëlqen me karakteristikat që ka, Pique i Barcelonës. Sot ka mbrojtës shumë të mirë, të rinj që po dalin, si Romagnoli. Edhe Chiellini më pëlqen”.
