Kreu i opozitës, Lulzim Basha e konsideron si aferë planin e qeverisë për të hequr kasat fiskale.
Në takimin e tij me strukturat e PD-së në Cërrik, Basha komentoi gjendjen e rëndë ekonomike, teksa ka renditur disa akte të rënda korrupsioni, të cilat sipas tij, pasurojnë kryeministrin Edi Rama dhe një grusht klientësh të tij.
“Shqiptarët janë të papunë për shkak të vjedhjes dhe të hajdutërisë së Edi Ramës të cilën nuk e ka parë dhe nuk e ka njohur Ballkani. Shikoni Milot Balldrenin, 7-fish koston e rrugës, shikoni Orikum-Vlorë. Vetëm këtë javë shikoni vjedhjet që bëjnë me tenderin e uniformës së policisë, dyfish i çmimit, nga 15 milionë në 30 milionë. Shikoni aferën tjetër me kasat fiskale siç e paralajmëruam para disa muajsh, Çdo biznes do të paguajë tarifë shtesë. Nuk ka kompani kroate. Është Olsi Rama. Pra, është Edi Rama që do t’i fusë ato para në xhep. Grabitja dhe pasurimi i tij dhe një grushti oligarkësh është i vetmi shkak për varfërimin e shqiptarëve, për rritjen e kostos së jetës, për shpunësimin masiv, për pamundësinë për të gjetur një vend pune”, deklaroi Basha.
Basha shprehet se kjo krizë nuk zgjidhet përmes pazareve por do të mbyllet vetëm psi të jenë çuar para drejtësisë të gjithë pushtetarët që kanë kryer krime.
“Kjo krizë do të zgjidhet përmes parimeve, jo përmes pazareve, përndryshe krizat do të përsëriten. Në Evropë çdokush që kapet me këto krime shkon para drejtësisë. Kjo krizë nuk do të mbyllet pa çuar para drejtësisë të gjithë pushtetarët e kapur në krim elektoral dhe në vjedhje të pasurive të shqiptarëve.
Kësaj radhe kriza do të mbyllet vetëm duke i dhënë fund pandëshkueshmërisë së politikanëve. Kësaj radhe kriza do të mbyllet vetëm me politikanë me pranga në duar”, tha Basha.
