Në Parlament është dorëzuar një projektligj i ri, sa i takon gjinisë së njerëzve. Në të propozohet që në dokumentet e identitetit, veç seksit “mashkull ose femër”, të shtohet një tjetër ndarje, pra i papërcaktuar “tjetër”.
Deputeti demokrat Tritan Shehu në një intervistë për Tirana Today thotë se Parlamenti nuk do ta votojë një nismë të tillë. Dhe nëse ndodh, atëherë do të bëhet referendum popullor, i cili do ta rrëzojë.
“Unë e konsideroj një absurditet. Njerëzit ndahen në meshkuj dhe femra, kjo është bazë e shoqërisë dhe mbijetesës njerëzore. Po ashtu, është bazë e familjes, e cila bazohet në një grua, një burrë dhe në të ardhmen edhe fëmijët. Të godasësh këto themele është padyshim shumë e rrezikshme. Çdokush mund të bëjë çfarë të dojë në shtëpinë e vetë, ditën apo natën. Por, të kërkosh të interferosh në dokumente thelbësore dhe ligjet e shtetit, të cilat bien ndesh me natyrën njerëzore, është e papranueshme. Parlamenti shqiptar nuk do ta miratojë.”
Sipas Shehut, po përgatitet një draft ligjor, me qëllim që të ndryshohet Kodi i Familjes.
“Ata po kërkojnë që të sanksionojnë në Kodin e Familjes martesat e të njëjtës gjini dhe atyre seksit ‘të tjerët’, për të cilët unë nuk e di çfarë nënkuptojnë.
Si edhe hapjes së rrugës për adoptimin e fëmijëve nga çifte të LGBT. Ne nuk mund të vëmë në rrezik edukimin e një fëmije. Ai ka nevojë për babin dhe nënën. Fëmija nuk mund të ketë dy baballarë apo dy mama, nuk mund të quhet kjo familje.
Unë jam shumë kundër diskriminimit të çdokujt, madje kam qenë ndër promotorët e ligjit kundër diskriminimit. Por, liria e dikujt mbaron kur cenohet liria e tjetrit. Dhe kështu po cenohen vlerat e shoqërisë njerëzore e ekzistencës. Familja nuk është e bazuar mbi seksin, por mbi vlerat e mëdha. Nëse dikush po kërkon të zëvendësojë konceptet e familjes, me ato seksuale, është duke gabuar rëndë.” TIRANA TODAY
