Gjatë Asamblesë Kombëtare të mbajtur ditën e premte, kryeministri Edi Rama bëri një njoftim shumë të rëndësishëm. Nëntë pjesëtarë të kabinetit u zëvendësuan, edhe pse më parë janë cilësuar si “aset i rëndësishëm” për socialistët. Por, protesta e studentëve dhe gjendja e tensionuar në vend bëri që kryeministri të ndërmarr lëvizje drastike.
Shkarkimi i gjysmës së ministrave nga kryeministri Edi Rama ka sjellë një reagim edhe te qytetarët. Ata shprehen për Tirana Today se e mbështesin këtë vendim, pasi sipas tyre ishte shumë i nevojshme ky ndryshim.
“Më pëlqen shumë që e hoqi Lindita Nikollën si ministre, sepse i la studentët dhe arsimin në gjendje katastrofike.”
“Rama duhet të kishte ikur vetë i pari, zgupthi dhe jo duke çaluar. Se vuri gjysmën e trupit të vetë për zv.kryeministër. Braçe është për të hapur shishen, po bëri mirë, po nuk bëri vari teneqenë.”
“Është një vendim shumë i drejtë. Tani le ta lemë qeverinë të punojë dhe pastaj të shohim rezultatin.”
“Këta ministrat e rinj as nuk i njohim fare, as nuk e dimë çfarë aktiviteti kanë pasur, asgjë. Por, edhe ata që u hoqën dje nuk kanë bërë gjë. Përkundrazi ata e çuan vendin në këtë gjendje që është.”
“Duhet ndryshimi i mendimit dhe jo individit. Sepse individët shkojnë e vijnë, por duhet të ndryshohet mënyra sesi e bëjnë politikën. Të rrijë kush të dojë në krye, mjafton të ndiqet Kushtetuta.”
Ndërkohë një risi tjetër është edhe emërimi i dy shqiptarëve nga Kosova në karriget ministrore. Ato janë Besa Shahini e cila do të zëvendësojë Lindita Nikollën, në Ministrinë e Arsimit. Dhe Gent Cakaj i cili merr stafetën e Ministrisë së Jashtme, duke zëvendësuar Ditmir Bushatin.
Por, duket se kjo gjë nuk është mirëpritur nga pjesa më e madhe e qytetarëve. Ata shprehen për Tirana Today se nuk kanë besim se kjo lëvizje do të sjellë një frymë të re në politikë.
“Unë nuk e di sesa është rregulluar Kosova dhe ka ngelur Shqipëria.”
“Nuk besoj që emrat e dy ministrave nga Kosova do të sjellin një frymë të re në politikë. Ato shumë mirë do të ishin atje në Kosovë, në Parlamentin e tyre. Sepse ne kemi shumë shqiptarë të mirë.”
“Çfarë na duhen kosovarët neve, nuk kanë rregulluar vendin e vetë. U acarova kur e dëgjova këtë si lajm. Ne kemi sa të duash këtu njerëz që janë të kualifikuar. Pse duhet të merrnim ata nga Kosova? I di Kosova hallet tona? Ne jemi ku të thërrasë qameti.”/ TIRANA TODAY
